Cruceiro do torreiro da festa do Alivio

Este cruceiro encóntrase no torreiro da festa do Alivio, no barrio de San Bieito da parroquia de Tomiño. Segundo a inscrición, moi erosionada, que leva na parte baixa do varal, foi levantado no ano 1900. Segundo a publicación de Fernández de la Cigoña e Loira do ano 2017 na inscrición, aínda, podía lerse «O/ DE/ JUAN/ BENI/ TO/ ALVA/ REZ V/1900». No momento da recollida de datos non era lexible. Presenta un só chanzo seguido dunha base troncopiramidal. Sobre esta, apoia un fuste liso de sección cadrada coas esquinas rebaixadas. Na parte superior un capitel de molduras cuadrangulares soporta unha cruz lisa de brazos cilíndricos.