Cruceiro do barrio do Barro Cruceiro

Cruceiro situado no barrio do Barro, nunha encrucillada e protexido por unha reixa de ferro. Presenta un chanzo sobre o que asenta unha base cúbica coas arestas superiores rebaixadas. Por todo o bisel das mesmas, leva unha inscrición bastante erosionada pero na que aínda se pode ler « ESTECRVCEROMA (superior) ANO1669 (inferior)/ NDOACER/REYROISVMEGE/RDOMRO RODRIGUES». O varal comeza cunha peza cuadrangular para dar paso a un fuste cilíndrico e acanalado no que sobresaen dúas esculturas opostas apoiadas sobre peañas, a un lado unha Piedade, e ao outro San Pedro coa chave que o identifica. O capitel é de tipo vexetal e sobre el, descansa a cruz coa Virxe do Rosario nunha das súas caras, e o Cristo Crucificado baixo cartela na outra.