Cruceiro de Sanomedio

O cruceiro de Sanomedio esta situado nunha encrucillada a poucos metros da capela que leva o mesmo nome. Presenta dous chanzos sobre os que asenta unha base cuadrangular de bordes superiores rebaixados. O fuste comeza cun primeiro tramo de sección cadrada que dá paso a un varal cilíndrico con acanaladuras no que sobresaen dúas imaxes que miran en direccións contrarias. A un lado, San Lourenzo, e ao outro, San Francisco. Como remate leva un capitel en forma de bóla no que se asenta unha cruz de brazos cilíndricos. Na base aprécianse restos do que podería ser unha inscrición gravada moi erosionada. Actualmente é ilexible.