Xapoeiro de Goián Xapoeiro

Sen dúbida a mellor representación coñecida de camelia en Tomiño. O tronco ramifica a escasa distancia do chan en dous brazos que rapidamente se volven dividir, polo que se pode dicir que forman unha verdadeira enforcadura a un metro do chan. A copa é grande e moi equilibrada, tanto por medrar illada —sen competencia pola luz— como debido ás actuacións de poda ás que é sometido o exemplar. Na súa base atopamos unha fermosa xardineira de pedra na que medran distintas especies ornamentais de pequeno tamaño, como azaleas (Rhododendron spp.) e distintas plantas suculentas (Echeveria elegans, Gasteria verrucosa etc.).