Ulmeiro de Campo Redondo Ulmeiro

Esta árbore crece na estrema da franxa de bosque da ribeira do Miño, contra unha zona onde este bosque se encontra máis castigado e con menor desenvolvemento, xunto ao embarcadoiro de Torrón. A pesar desta posición, destaca pouco debido á presenza próxima dun carballo e dun chopo híbrido de maior altura, así como por ter a base de tronco oculta por falsos bambús ou canas indias (Phyllostachys spp.), plantas exóticas que constitúen a peor peste das veigas e ribeiras do río. O tronco do ulmeiro bifúrcase a uns dous metros de altura e ábrese nunha copa inclinada cara ao espazo aberto das veigas. Uns 150 m ao norte encóntrase outro ulmeiro, de fuste moi recto pero menor perímetro (0,89 m).