Sobreiros de San Roque Sobreiro

Conxunto de sobreiros que protagonizan a cobertura arbórea no adro e na inmediata proximidade da capela de San Roque, espazo de interese histórico e patrimonial. Agrupa 14 exemplares de porte notable concentrados en aproximadamente 2.300 m2, distribuídos en catro núcleos: un ao norte da ermida, con dúas árbores xunto a un parque infantil (A); outros dous núcleos ao oeste, integrados por cadanseus grupos de 5 sobreiros separados pola estrada de acceso ao Espazo Fortaleza (B e C), e un cuarto aínda máis ao leste, con dous exemplares no lindeiro dunha propiedade particular próxima (D). Con todo, nos arredores encóntranse máis sobreiros de menor porte, principalmente en espazos axardinados anexos a vivendas. A súa idade foi estimada en máis de 250 anos. Pese a ter sido propostos e desbotados para o Catálogo Galego de Árbores Senlleiras, o conxunto reúne características que achamos merecedoras da súa inclusión. Nos sobreiros de San Roque son visibles os efectos de reiteradas podas: en xeral, todos os exemplares presentan copa reducida para o seu tamaño e nalgúns casos configuran troncos irregulares, con engrosamentos de perímetro superior ao da base. O núcleo C, con 5 exemplares moi próximos, é o que mostra maior redución de altura e copas. O estado fitosanitario é deficiente.