Carballos turcos do Argallo Carballo turco

Aínda que non se trata de individuos de avanzada idade nin dimensións espectaculares, o conxunto de carballos turcos de Argallo é unha das poucas formacións desta especie en Galicia, o que lle outorga certa singularidade. Ocupan unha superficie de aproximadamente 1,05 ha ao longo de ambas as marxes do regueiro dunha valgada. Moitos dos integrantes da formación presentan bifurcacións a escasos centímetros do chan, o que lle confire á masa o aspecto natural característico das árbores sen tratamentos silvícolas como podas ou clareos, pero si con rozas periódicas. Pola súa situación de cheo no monte, cómpre limitar a zona de ocupación desta especie e controlar a súa naturalización e espallamento por ladeiras próximas, sen descartar que no futuro poida ser recomendable erradicar a formación se se comprobase comportamento invasor. Dentro da formación, destacan catro exemplares que se presentan a pares, próximos á beira do rego que configura a valgada.