Carballos da nacente do Pego Carballo

Trátase de dous exemplares distanciados case un cento de metros, pero enclavados nunha área con notable riqueza de especies remanentes da vexetación forestal natural do territorio, circunstancia que motiva a súa catalogación. Nesta mesma zona de paisaxe tradicional de sebes e campos, na cabeceira do río do Pego por baixo de Cristelos, medran tamén as tres abeleiras catalogadas, xunto a plantas características destas carballeiras, algunhas moi vistosas e pouco comúns no concello (Polygonatum odoratum, Hypericum androsaemum, Aquilegia vulgaris...). Os dous exemplares posúen troncos dereitos, cubertos por brións e plantas epífitas (couselos, fentos Polypodium...). A ramificación e formación da copa concéntrase a partir dos cinco metros de altura, no segundo exemplar claramente motivada por unha demouca.